काठमाडौं। गैरआवासीय नेपाली संघ (एनआरएनए) ले सेती प्रादेशिक अस्पतालमा अक्सिजन प्लान्ट स्थापना गरेको छ।

बिहीबार धनगढीमा आयोजित एक कार्यक्रममा संघका अध्यक्ष डा‍‍. बद्री केसीले अस्पतालका अध्यक्ष नरबहादुर शाहलाई १ करोड २५ लाख रुपैयाँमा निर्मित अक्सिजन प्लान्ट हस्तान्तरण गरेका हुन्

प्लान्टको उद्दघाटन गर्दै शुदुरपश्चिम प्रदेशका सामाजिक विकास मन्त्री झपटबहादुर साउदले अक्सिजन प्लान्ट स्थापना गरेर एनआएरएनएले सहयोग गरेकोमा धन्यवाद ज्ञापन गरे।

उनले सुदूरपश्चिमको स्वास्थ्यलाई सेती प्रादेशिक अस्पतालले थेगेको समेत बताए।

मन्त्री साउदले प्रदेशको बेरोजगारी र गरिबी अन्त्यका लागि सुदूरपश्चिममा केही परियोजना सञ्चालन गर्न एनआरएनएलाई आग्रह गरे।

उनले सुदूरपश्चिममा जनशक्तिको अभाव नरहेको उल्लेख गर्दै बेरोजगारी समस्याका कारण प्रदेशको श्रम भारत पलायन भइरहेकोमा चिन्ता व्यक्त गरे।

कार्यक्रममा अध्यक्ष डा. केसीले कोरोना महामारीको बेला संघले विदेशमा र नेपालमा रहेका नेपालीहरुलाई ठूलो सहयोग पु–याएको स्मरण गरे।

उनले आफ्नो गाँस काटेर विदेशमा बस्ने नेपालीहरुले देशमा प्राकृतिक प्रकोप, भूकम्प वा अन्य महामारीमा सहयोग गर्दै आएको बताए।

कार्यक्रममा बोल्दै डा. केसीले सेती प्रादेशिक अस्पतालमा कार्यरत स्वास्थ्यकर्मीको दक्षता अभिवृद्धिका लागि संघले सहकार्य गर्ने प्रतिबद्धता समेत जनाए।

विभिन्न मुलुकमा रहेका गैरआवासीय नेपालीले प्रविधि र विभिन्न कुरामा विशेषज्ञता हासिल गरेको जनाउँदै डा. केसीले उनीहरूले हासिल गरेको विशेषज्ञताबारे जानकारीका लागि सहकार्य गर्ने बताए।

कार्यक्रममा संघका उपाध्यक्ष रामशरण सिमखडाले सानो सहयोगले पनि मानिसको ज्यान जोखिमबाट बच्न सक्ने भएकाले मोवाइल ब्लड बस, अक्सिजन प्लान हस्तान्तरण गरेको बताए।

उनले नेपालका दुर्गम क्षेत्रमा टेलिमेडिसनको सेवा संचालन गर्न सकिने बताउँदै आगामी दिनमा संघको सहकार्यमा टेलिमेडिसीन कार्यक्रम संचालन गर्न सकिने बताए।

कार्यक्रममा अस्पतालका अध्यक्ष शाहले संघले प्लान्ट हस्तान्तरण गरेपछि अस्पताल अक्सिजनमा पूर्णरुपमा आत्मर्निभर भएको बताए।

उक्त प्लान्टले हावामा रहेको अन्य अक्सिजनलाई प्रशोधन गरेर १ घण्टामा ८ वटा सिलिन्डर तयार गर्न सक्छ।

प्रदेश आपूर्ति व्यवस्था केन्द्रका प्रमुख डा। नीरज अर्यालले सेतीमा अक्सिजन प्लान्ट स्थापनाले ठूलो हौसला मिलेको बताए।

कार्यक्रममा ओसिनिया क्षेत्रीय संयोजक दिनेश पोखरेल, हेमन्त काफ्ले आइसीसी सदस्य, सल्लाहकाहरु टिबी कार्की, अतुल कोइराला, भैरव ढकाल, भवानी ओली विधान संशोधन समितिका संयोजक, अर्जुन श्रेष्ठ पूर्वउपाध्यक्ष, राष्ट्रिय समन्वय परिषद् माल्टाका उपाध्यक्ष सत्यनारायण झा, संघका प्रमुख कार्यकारी अधिकृत राजेन्द्रकुमार राउत, अधिकृत कुनाल मिश्रा रअभियान्ता तिर्थ भट्टराईको उपस्थिति थियो।