३५ देशका एनआरएन प्रतिनिधि युराेपमा
युरोप सम्मेलनको पूर्वसन्ध्यामा चेकको छिमेकी देश अष्ट्रियामा भेला भएका एनआरएन प्रतिनिधि 
काठमाडौंं। गैरआवासीय नेपाली संघ (एनआरएनए) को १५ औं युरोपेली सम्मेलनका लागि ३५ देशका प्रतिनिधि चेक रिपब्लिकमा भेला भएका छन्।
तीन दिनसम्म चल्ने सम्मेलन शुक्रवारदेखि राजधानी प्रागमा सुरु हुँदैछ।
सम्मेलनको उद्घाटन संविधानसभाका पूर्वअध्यक्ष सुवास नेम्वाङले गर्ने तयारी छ।
अमेरिका, क्यानाडा, मध्यपूर्व, जापान, मलेसिया र नेपाललगायत विश्वका ३५ भन्दा बढी मुलुकका ३ सय बढी प्रतिनिधिको सहभागीता रहने सम्मेलनको समापन समारोहमा नेपाल सरकारका परराष्ट्रमन्त्री एनपी साउद सहभागी हुने कार्यक्रम छ।
सम्मेलनको व्यवस्थापनको जिम्मा गैरआवासीय नेपाली संघ चेक रिपब्लिकले पाएको छ। यस्तै, सम्मेलनको नेतृत्व क्षेत्रीय संयोजकद्वय सन्तोष भट्टराई र चिन्तामणी सापकोटाले लिएका छन्।
संघका कार्यकारी अध्यक्ष डा. बद्री केसीका अनुसार सम्मेलनमा संघका नियमित एजेण्डालगायत नेपालमा १० अर्बको लगानी, नेपाली नागरिकताको निरन्तरता, गैरआवासीय नेपालीलाई मताधिकार, सामाजिक सुरक्षा कोष लगायतका विषयमा घनिभूत छलफल हुनेछ।
यस्तै, सम्मेलनमा संघको विधान, आन्तरिक एकता, सदस्यता वितरण र आगामी १५ औं विश्व सम्मेलन लगायतका विषयमा समेत छलफल हुनेछ।
उपाध्यक्ष डा. हेमराज शर्माले नेपालमा जति पुँजीको लगानी छ त्यति नै सिप, ज्ञान र प्रविधिको लगानीको महत्व भएको भन्दै क्षेत्रीय सम्मेलनमा नेपालीमा बौद्धिक लगानीको सम्भावना र चुनौतीका बारेमा समेत छलफल गरिने बताए।
सम्मेलनमा नेपाली कांग्रेसका सचेतक रमेश लेखक, नेकपा एमाले उपाध्यक्ष सुवास नेम्वाङ, नेपाल स्वतन्त्र पार्टीका सांसद मनिष झा सहभागी हुनुहुनेछ।
यस्तै, गैरआवासीय नेपाली संघका केन्द्रीय पदाधिकारीहरु नेपाल सरकार, नेपाल उद्योग वाणिज्य महासंघ, पत्रकारहरू, गैर आवासीय नेपाली संघ अन्तर्राष्ट्रिय कमिटीका केन्द्रिय अध्यक्षहरु, पूर्वअध्यक्षहरु, पत्रकारहरु र संस्थापकहरुको उपस्थिति रहनेछ। सम्मेलनमा भाग लिन बिहीबार नै विभिन्न देशका गैरआवासीय नेपाली पदाधिकारी एवं अतिथिगढ प्राग पुगेका छन्।
यस्तो छ कार्यक्रम
संघका उपमहासचिव रामशरण सिम्खडाका अनुसार शुक्रवार दिउँसोदेखि संघको औपचारिक कार्यक्रम सुरु हुनेछ । पहिलो दिन, शुक्रवार विहानैदेखि प्रतिनिधिहरुको दर्ता प्रारम्भ हुनेछ।
दिउँसो २ बजेदेखिबाट संस्थागत गतिविधिहरु हुनेछन्। २ बजेदेखि साँझ ५ बजेसम्म स्मार्ट एनआरएनए, सदस्यता वितरण, निर्वाचन प्रकृया, एनआरएनए विधान र राष्ट्रिय समितिबीचको सञ्जालको बारेमा छलफल हुनेछ भने साँझ ५ बजेदेखि उद्घाटन शत्र शुरु हुनेछ।
सम्मेलनको दोस्रो दिन, शनिवार राष्ट्रिय समितिको प्रतिवेदन, युवा र महिला सम्मेलन, मिलाप (एकता) एनआरएनए मेघा प्रोजेक्ट, नेपाल प्रमोशन लगायतका कार्यक्रम तय गरिएको छ।
यस्तै, सम्मेलनको तेस्रो दिन, आइतवार नेपालमा १० अर्व लगानी, नेपाली नागरिकताको निरन्तरता, भोटिङ राइट, सामाजिक सुरक्षा कोष, सीप, ज्ञान तथा प्रविधि ट्रान्फर लगायतका विषयमा छलफल हुनेछ। सम्मेलनको अन्त्यमा पराग घोषणपत्र जारी गरिनेछ।
