एन्फा कार्यसमिति बैठक भोलि बस्दै

एन्फा कार्यसमिति बैठक भोलि बस्दै

काठमाडौं। दुई पटक स्थगित भइसकेको अखिल नेपाल फुटबल संघ (एन्फा) कार्यसमितिको बैठक भोलि (बिहीबार) बस्ने बताईएको छ। सातदोबाटोस्थित एन्फा मुख्यालयमा बस्ने बैठक १० बजेबाट सुरु हुने जनाईएको छ। यसअघि समेत बैठक दुई पटक बोलाएर बस्न सकेको थिएन। साउन २मा बोलाइएको बैठकमा अध्यक्ष पंकजविक्रम नेम्बाङ अस्वस्थ भएपछि स्थगित गरिएको थियो।त्यसपछि ५ साउनमा बसेको बैठक पनि स्थगित भएको थियो। पछिल्लो समय पदाधिकारी भागबन्डा नमिल्दा बैठक स्थगित हुँदै आएको बताईएको छ।

६ असारमा निवर्तमान अध्यक्ष कर्माछिरिङ शेर्पालाई ६ मतले पराजित गर्दै अध्यक्षमा निर्वाचित भएका नेम्बाङ आफ्नो चुनावी अभियानमा सहयोग गरेका साथीहरूलाई खुसी राख्न असफल भएका छन।

चुनावमा सहयोग गरेका पूर्वअध्यक्ष गणेश थापा र जर्मन नागरिक नविन पाँडेबीच बढ्दै गएको असन्तुष्टिका कारण पंकज चेपुवामा परेका छन्। पाँडेबाट बढी दबाब खेप्दै आएपछि नेम्बाङले थापा समूहलाई बेवास्ता गर्दै आएका छन्। पाँडे एन्फा राजनीतिमा हावी भएसँगै कार्यसमितिमा बहुमत भएको थापा पक्षले पाँडेको बर्खास्तीको माग गरेको छ।

जसका कारण १९ मध्ये १३ सदस्यले हस्ताक्षर गर्दै अन्तरराष्ट्रिय विभाग प्रमुख पाँडेको बर्खास्ती माग गरेका छन्। भोलिको बैठकमा सबैको ध्यान यसैमा हुनेछ।यस्तै,प्रवक्ता सहित तीन सहमहासचिव,मनार्थ अध्यक्षको नियुक्त हुनेछ। यस्तै,महिला साफ आयोजना समेत मुख्य विषय रहेको छ।

भोलि हुने बैठकमा २२ एजेन्डा रहेका छन।