आबुधावी । संयुक्त अरब इमिरेट्स (यूएई) को आबुधाबीमा सोमबार भएको ग्यास विष्फोटमा दुई जनाको मृत्यु हुनाको साथै सयभन्दा बढी घाइते भएका छन्।

प्रारम्भिक तथ्याङ्कअनुसार ६४ जनालाई सामान्य चोटपटक लागेको र ५६ जनालाई गम्भिर चोटपटक लागेको आबुधावीका अधिकारीहरूले पुष्टि गरेका छन्। घाइतेहरुलाई आवश्यक स्वास्थ्य उपचारका लागि अस्पताल लगिएको बताइएको छ।

अल खालिदिया क्षेत्रमा भएको सो विष्फोटबाट पसल र ६  वटा भवनमा क्षति पुगेको छ। सो घटनास्थलमा विशेषज्ञ टोलीले अपरेसन जारी राखेको आबुधावी प्रहरीले बताएको छ।

अधिकारीहरूले विस्फोटबाट प्रभावित ६ वटा आवासीय भवनबाट त्यहाँ रहेका मानिसलाई सुरक्षित स्थानमा सारिएको पुष्टि गरेका छन्।

भवनहरू पूर्ण रूपमा सुरक्षित नहुँदासम्म प्रभावित मानिसलाई अस्थायी आवास उपलब्ध गराउने काम भइरहेको बताइएको छ।