काठमाडौं। गैरआवासीय नेपाली संघ (एनआरएनए) का महासचिव गौरीराज जोशीले नयाँ कार्यसमितिबाट काम गर्न सहज नभएको भन्दै निराशा व्यक्त गरेका छन्।

संघको अमेरिका क्षेत्रीय समितिले शनिवार आयोजना गरेको नयाँ वर्ष विशेष शुभकामना आदानप्रदान कार्यक्रमलाई सम्बोधन गर्दै महासचिव जोशीले अहिलेकाे जम्बो कार्यसमितिबाट काम गर्न त्यति सजिलो नभएको भन्दै आफू आशावादी नभएको बताए।

आगामी १८ महिनामा निष्पक्ष  निर्वाचन गरेर नयाँ नेतृत्व हस्तान्तरण गर्न सक्नु नै वर्तमान कार्यसमितिको लागि ठूलो उपलब्धि ठहरिने जोशीको भनाइ छ।

जोशीले संघको विधान, कार्यसमिति, सचिवालय, राष्ट्रिय समिति (एनसीसी) मा थुप्रै समस्या र चुनौती रहेको भन्दै चिन्ता व्यक्त गरे। वर्तमान कार्यसमिति कठिन अवस्थामा रहेको जोशीले बताए।

संघमा अहिले जोशी र डा. केशव पौडेल महासचिवको जिम्मेवारीमा छन्।