ब्राजिलमा बाढी पहिरो, १८५ को मृत्यु

ब्राजिलमा बाढी पहिरो, १८५ को मृत्यु

ब्रासिलिया । ब्राजिलको रियो डि जेनेरियो राज्यको पर्यटकीय सहर पेट्रोपोलिसमा गत साताबाट परेको भारी वर्षाका कारण मृत्यु हुनेको संख्या १८५ पुगेको स्थानीय अधिकारीले मङ्गलबार जनाएका छन्।

रियो डि जेनेरियो राज्यबाट ६८ किलो मिटर उत्तरमा अवस्थित पेट्रोपोलिस नगरपालिकामा जारी यस बाढीमा परेर अरु कम्तीमा ८५ जना अझै पनि हराइरहेका उनीहरुले जानकारी दिएका छन्।

यस क्षेत्रमा सबैभन्दा तीव्र वर्षा फेब्रुअरी १५ मा रेकर्ड गरिएको थियो। त्यस दिनको बर्षा सन् १९३२ पछिको सबैभन्दा बढीे थियो।

वर्षाका कारण मानवीयका साथै अन्य भौतिक सम्पत्तिमा पनि क्षति पुगेको छ। त्यसपछि धेरै पटक भारी वर्षा भएको छ।

हालको रेकर्ड गरिएको मृत्युको संख्या इतिहासमा सबैभन्दा धेरै हो। सन् १९८८ मा विनाशकारी भारी वर्षाको कारण १७१ व्यक्तिको मृत्यु भएको थियो।

गएको आठ दिनदेखि वर्षा र त्यसका कारण बाढी पहिरोको प्रकोप जारी नै रहेको छ। स्थानीय अधिकारीले दिएको जानकारी अनुसार व्यापक वर्षाका कारण सडक बन्द भएका छन् भने ठूलो मात्रामा भौतिक सम्पत्तिमा पनि क्षति पुगेको छ।

यसबाट हजारौँ मानिस प्रभावित बनेका अधिकारीले जनाएका छन्। उद्धारकर्मीको भनाइअनुसार सबैभन्दा बढी क्षति पेट्रोपोलिस सहरमा भएको छ।

बाढी तथा डुबानका कारण करिब दर्जनौँ घर क्षतिग्रस्त भएका र सयौँ जनालाई प्राय जसो विद्यालयमा आश्रय दिइएको छ। विशेषज्ञको भनाइअनुसार जलवायु परिवर्तनको प्रभावले अहिले भारी मात्रामा वर्षा बढाइरहेको छ।

व्यवसायहरू मंगलबार पुनः खोल्न थालिएको छ। मानिसहरूले घरहरू, ऐतिहासिक भवनहरू र डाउनटाउन क्षेत्र सफा गर्न जारी राखेका छन्।

पहिरो र बाढीबाट हालसम्म करिब ६२० टन माटो निस्किएको फोहोर संकलन गर्ने कम्पनीले जनाएको छ।