दोहा। कोरोना संक्रमणका कारण कतारमा एक जनाको निधन भएको छ। कतारको जनस्वास्थ्य मन्त्रालयले जारी गरेको रिपोर्टअनुसार पछिल्लो २४ घण्टामा यहाँ कोरोनाका ८२ संक्रमित फेला परेका छन्, जसमा ६३ संक्रमित सामुदायिक भएको र १९ जना विदेशबाट फर्किएको यात्रु छन्।

जनस्वास्थ्य मन्त्रालयको रिपोर्टमा ६६ जना निको भएर घर फर्किएको पनि उल्लेख छ। कतारमा कोरोनाबाट निको हुनेको संख्या २ लाख ३६ हजार ९ सय ६ पुगेको स्थानीय पेनेन्सुला अखबारले पनि स्पष्ट पारेको छ।

पछिल्लो २४ घण्टामा कोरोनाबाट मर्नेको उमेर ४१ वर्षको भएको तर, उनको नाम सार्वजनिक गरिएको छैन। कतारमा हालसम्म ६ सय ९ जना कोरोना संक्रमणका कारण मरिसकेका छन्।

कतारमा हालसम्म कूल कोभिड–१९ सङ्क्रमितको सङ्ख्या २ लाख ३८ हजार ५१८ पुगेको छ भने १ सय ३ सक्रिय बिरामी उपचाररत छन्।