पत्रकार महासंघ युरोपको अधिवेशन रोक्न केन्द्रमा उजुरी

पत्रकार महासंघ युरोपको अधिवेशन रोक्न केन्द्रमा उजुरी

जर्मनी। एक पक्षीय रुपमा अधिवेशन आह्वान गरिएको दावी गर्दै नेपाल पत्रकार महासंघ, युरोप शाखाको अधिवेशन रोक्न माग गर्दै महासंघको केन्द्रीय कार्यालयमा उजुरी परेको छ।

युरोप शाखाका कार्यवाहक अध्यक्ष डिल्लीराम अम्माईं र महासचिव योगेन्द्र मिलन छन्त्यालले शाखाका बहुमत सदस्यद्वारा निलम्बित अध्यक्ष केजीन राईले यही २० फेब्रुवरीका लागि तय गरेको शाखा अधिवेशन अवैध रहेको भन्दै त्यसलाई रोक्न माग गरेका हुन् ।

महासंघका अध्यक्ष गोविन्द आचार्यलाई पत्र लेखी उनीहरुले शाखामा देखिएका विवाद समाधान नभएसम्म राईको नेतृत्वमा हुने कुनै पनि गतिविधि अमान्य हुने दावी गरेका छन् । सदस्यताको टुंगो लगाई प्रक्रिया पूरा गरेर मात्रै अधिवेशन आह्वान हुनुपर्ने भन्दै उनीहरुले अधिवेशन गर्नु भन्दा पहिले राईले संस्थाका नाममा गरेको अनियमितताको छानबिन हुनुपर्ने माग गरेका छन् ।

यसअघि नै बहुमत सदस्यहरुले निर्णय गरी केन्द्रमा पठाएको पत्रका बारेमा ध्यान दिन आग्रह गरिएको छ ।

पत्रमा ‘संस्थाको नाममा राईले गरेको अनियमितता,संस्थाको लोगोको दुरुपयोग गरेको, महासचिवकै नक्कली हस्ताक्षर गरेको, सम्बन्धित सदस्यको सहमति विना गरिएको सदस्यता स्थानान्तरण लगायतका मुद्दाको छानबिन गरी टुंगो लगाउन’ माग गरिएको छ।

आन्तरिक छानबिन नै नगरी जिम्मेवारीबाट नै हटाइएका व्यक्तिले एकपक्षीय रुपमा आह्वान गरेको अधिवेशन मान्य नहुने उनीहरुको भनाइ छ । सहमतिका आधारमा सबैलाई मान्य हुने गरी अधिवेशनको मिति तय गर्नुपर्ने उनीहरुको माग छ।