सौल। दक्षिण कोरियाको सत्तारुढ डेमोक्रेटिक पार्टीको केन्द्रीय समिति अन्तर्गको मल्टिकल्चरल विभागको उपाध्यक्षमा नेपाली मुलका यज्ञराज सुवेदी निर्वाचित भएका छन् । बुधवार उनलाई पार्टीका अध्यक्ष तथा पूर्वप्रधानमन्त्री इ नाक यन र उपसमिति सभापति सांसद गो यङ् इनले उपाध्यक्षमा नियुक्त गरेका हुन् ।

यसअघि उनी राज्य समितिको अध्यक्ष पदमा निर्वाचित थिए । पार्टीका प्रतिनिधिहरुले नै मतदान गर्ने यो पदका लागि सुवेदी निर्वाचनबाट नै चुनिएका थिए । अध्यक्ष पदका लागि भएको मतदानमा कोरियन नागरिकसँग उनले प्रतिस्पर्धा गरेका थिए।

राज्य समितिहरुको अध्यक्षबाट छनोट भएपछि सुवेदी केन्द्रीय समितिको उपाध्यक्षमा नियुक्त भएका हुन्।

कोरियामा दुइ ठूला पार्टी छन्,डेमोक्रेटिक र कन्जरभेटिभ । डेमोक्रेटिक पार्टीका विभिन्न विभिन्न विभागहरु छन्। पहिले कोरियामा ‘एउटै जाती,एउटै भेष’को नीति थियो । कोरियामा आप्रवासीको संख्या बढेपछि डेमोक्रेटिक पार्टीले मल्टीकल्चरल विभाग बनाएको हो । विभागको अध्यक्ष पार्टी केन्द्रीय समितिको वैठकमा सहभागी हुन पाउने प्रावधान छ।

यो विभाग विशेष मानिन्छ । आप्रवासीहरुको नीति नियम बनाउन यसको विशेष भूमिका रहन्छ । यसले बनाएका वा सिफारिस गरेका नीति नियमहरु पार्टी मार्फत सरकारमा जान्छन् । यसमा आवद्ध सांसदहरुले आप्रवासी सम्बन्धी नीति तथा कानूनहरु संसोधन गर्न सिधै लैजान पाउँछन् ।

निर्वाचनमा विजयी भएपछि सुवेदीले प्रवास खबरसँग भने,‘कोरियामा रहेका नेपाली सहितका आप्रवासीका लागि विभेद नहुने कानून बनाउन र भएका कानून पनि कडाईकासाथ लागु गर्न दवाव दिन मेरो भुमिका रहन्छ ।’

ताप्लेजुङमा जन्मिएका सुवेदीले काठमाडौंको सरस्वती क्याम्पसबाट वाणिज्यशास्त्रमा स्नातक गरेका थिए । सन् १९९६ मा उनी कामदारका रुपमा कोरिया पुगेका थिए । काम सँगसँगै उनले मानवशास्त्रमा कोरियाबाट स्नातकोत्तर गरेका थिए। पढाई सक्काएपछि उनले कोरियामा रहेका आप्रवासीका लागि सहयोग पुग्ने उदेश्यले सामाजिक संस्थाको रुपमा आप्रवासी सहयोग केन्द्र स्थापना गरे । यो संस्थामार्फत उनले विदेशी आप्रवासी र यसमा पनि बढीजसो नेपालीलाई सहयोग गरे।

सुवेदीले सन् २००९ देखि कोरियाको नागरिकता प्राप्त गरेका हुन् ।