अष्ट्रेलियाको पानीमा डुब्दैछन् नेपाली,सचेतना आवश्यक

अष्ट्रेलियाको पानीमा डुब्दैछन् नेपाली,सचेतना आवश्यक

सिड्नी । नेपालमा समुन्द्र छैन्। सम्भवत यही कारण होला,विदेश आएका नेपाली समुन्द्रको पानीसँग अभ्यस्त हुन सक्दैनन् । यही कारण हो,विदेशका समुद्रमा पटक–पटक दुर्घटनाको शिकार हुन पुग्छन नेपाली । समुद्रको पानीको आफ्नै भाषा हुन्छ,आफनै लय हुन्छ ।

पानी रहेको सार्वजनिक थलोमा विचरण गर्ने विदेशका आ–आफ्नै नियम कानून छन्। कहिलेकाँही यसकै वेवास्ता गर्दा र पानीको भाषा नबुझिँदा समस्या पर्न सक्छ ।

पछिल्लो समय यस्तै समस्यामा परेका छन्,अष्ट्रेलियापुगेका नेपाली । समुन्द्रमा मात्र हैन,तलाउमा समेत डुबेर मुत्यु भएका घटना बाहिर आएका छन् ।

मंगलवार यस्तै दुखद घटना घट्यो अष्ट्रेलियाको ब्रिसबेन नजिक सनसाइनकोष्टमा ।पौडी खेल्ने क्रममा पानीमा डुबेर पर्वत घर भएका एक ४० वर्षीय नेपाली युवाको निधन हुन पुग्यो ।

गैरआवासीय नेपाली संघ कुइन्सल्याडका अनुसार १८ महिनाअघि डिपेण्डेण्ड भिसामा रहेका ती नेपाली युवाको पट मलेनीस्थित गार्डेनर्स झरनाको तलाउमा डुबेर निधन हुन पुग्यो ।

पौडी खेलेपछि नजिकैको ढुङ्गामा बसिरहेका ती पुरुष केही बेरपछि पानीमा खसेर बेपत्ता भएको प्रत्यक्षदर्शीले बताएका छन् ।

मंगलबार साँझ ५ बजेतिर बेपत्ता ती पुरुषको शव साँझ ८ बजेतिर करिव ६ मिटर तल तलाउबाट प्रहरीले बरामद गरेको थियो । उनीसँगै उनका चार जना साथीहरु पनि पौडी खेल्न गएका थिए ।

अष्ट्रेलियाको चर्को गर्मीबाट पार पाउन यहाँ रहेका धेरै नेपालीहरु पौडी खेल्न पुग्छन। पछिल्लो एक वर्षमा पानीमा डुबेर मर्नेको संख्या आधा दर्जनभन्दा बढी रहेको छ

यसअघि सिड्नी नजिकैको वाटामोल्ला पार्कमा रहेको पोखरीमा पौडी खेल्ने क्रममा डुबेर झापाका २७ वर्षीय विद्यार्थी सचित विमलीको निधन भएको थियो ।

सन् २०२० मा मात्रै अष्ट्रेलियामा ६ जना नेपालीले समुन्द्रमा डुबेर ज्यान गुमाएका थिए । यो वर्षको पहिलो महिना नै सिड्नीको उत्तरमा रहेका बेरोरा वाटर्स क्षेत्रमा चितवनका विशाल सेढाइ र धादिङका रोशन छत्कुलीको पौडी खेल्ने क्रममा डुबेर निधन भएको थियो । यही समयमा यहाँको अरेन्ज सहरमा नेपाली युवा रुपेन तामाङको तलाउमा डुबेर निधन भएको थियो । यसैगरी गत वर्षको फेब्रुअरीमा ३२ वर्षिय नेपाली युवा अमित सोनार समुद्री तटमा मृत अवस्थामा फेला परेका थिए ।

त्यस्तै ब्रिसबेन नजिकैको स्ट्राटब्रक आईल्याण्ड नजिकै समुन्द्र किनारमा पौडी खेल्ने क्रममा डुबेर पोखराका निकित श्रेष्ठको पनि निधन भएको थियो ।

एनआरएनए कुइन्सल्याण्डका संयोजक उमेश खड्काका अनुसार अष्ट्रेलियामा पौडीन मिल्ने सार्वजनिक स्थानहरुका आफ्नै नियम कानून छन्,त्यसको पालना गर्दा अलिकति पनि चुक्ने हो भने दुर्घटना हुने गरेका छन् ।

‘हामी चाँडै नै जनचेतना कार्यक्रम ल्याउने तयारीमा छौं,’ संयोजक खड्काले प्रवासखबरसँग भने,‘पौडीदाखेरी पालना गर्नुपर्ने आफ्नै नियम कानून हुन्छन,हामी हाम्रो नेपाली समुदायलाई यसबारे जागरुक गराउने कोशिस गर्छौ ।’

 




Leave a Reply

Your email address will not be published. Required fields are marked *